Na mañá do 29 de novembro, baixo unha choiva fina, emprendemos xunto ao herpetólogo Martiño Cabana da AGCT unha xornada de campo polo contorno de Sete Muiños, no concello de Guitiriz, para buscar á saramaganta (Chioglossa lusitanica), unha actividade financiada pola Área de Medio Ambiente da Deputación de Lugo.
Ademais de atopar sete exemplares deste icónico anfibio que habita as zonas húmidas e frescas do noroeste peninsular, os asistentes leváronse a Guía para identificala correctamente e coñecer máis sobre a súa bioloxía e distribución.
Ao longo do percorrido, tamén puidemos ver outros animais de ambientes acuáticos, como o macho de ditisco da foto, e outros anfibios: a ra verde (Pelophylax perezi), a ra do monte (Rana galaica), o limpafontes común (Lissotriton boscai) e o limpafontes verde (Triturus marmoratus).
Foi unha mañá moi emocionante, que rematou cunha degustación de produtos elaborados na Reserva da Biosfera de Terras do Miño.
Co apoio da Área de Medio Ambiente da @depulugo e a colaboración de Martiño Cabana.
